Dit word van alle lede én gaste verwag om die volgende reëls na te kom.

Elke Ndaba lid is ‘n trotse verteenwoordiger gedurende Ndaba geleenthede en is daarom onderhewig aan die gesag van die stapleier en die bestuur.

• Rus jouself behoorlik toe om te kan klim, klouter, stap, of te kan swem na gelang van die roete en oornag reëlings.
• Ter wille van die groep se veiligheid en die suksesvolle verloop van die stap moet die stapleier se besluite en versoeke te alle tye gehoorsaam en gerespekteer word.
• Ons kuier saam, lag saam, stap saam. Niemand mag van die groep afdwaal of vooruit stap tensy dit die leier se goedkeuring wegdra nie. Almal stap in groepies en niemand stap alleen nie. Die leier sal stapleiers aanwys in die groepies soos en wanneer nodig.
• In swak weer, soos reën en mis, moet elke stapper heeltyd bewus wees van waar die persoon voor en agter hom/haar stap.
• Wanneer jy om ‘n spesifieke rede die stappaadjie moet verlaat, los jou rugsak langs die voetpad sodat dit sigbaar is.
• Gehoorsaam die reëls en regulasies en respekteer die eiendom van die grondeienaars en gebied oor wie se grond gestap word, deur bv. nie hekke oop te los of draadheinings te beskadig nie. Die klub se toegangsregte kan in die gedrang kom as persone onverantwoordelik optree.
• Oornagplekke moet skoon en netjies gelaat word. Alle rommel moet saam terug gedra word as vullishouers nie by oornagplekke voorsien word nie. Moenie vullis begrawe nie. Hou altyd ‘n plastieksakkie byderhand vir snesies.
• Laat mooi voetspore agter en moet niks vernietig nie.
• Neem baie fotos en vat groot happe vars lug.
• Hou waterbronne soos strome, fonteine, of tenks skoon deur dit nie te besoedel nie. Seep mag nie in ‘n waterstroom gebruik word nie.
• Vure mag slegs aangesteek word waar dit toelaatbaar én veilig is. Brandhout moet spaarsaam gebruik word en vure deeglik geblus word. Wees ook baie versigtig wanneer stofies gebruik word sodat dit nie ‘n veldbrand kan veroorsaak nie.
• Wat toiletgewoontes betref in die veld, volg die kat se voorbeeld en begrawe behoorlik.
• Onthou wie jy is en wees vriendelik, bedagsaam en behulpsaam teenoor mede lede en besoekers. Respekteer mekaar, mekaar se eiendom, en die behoefte aan privaatheid en stilte.